(علمنا الحب قمرنا)بقلم الشاعر " السيد ابوطاحون "

قصائد قصيره 24    *** بقلم السيدابوطاحون
*********
علمنا الحب قمرنا
وطلع من غير مواعيد
و زارنا و نور دارنا
ورقص ف إديه العيد

صباح صاحي وكله حنان
من اسمك
وصباحي يقول ألحان
على رسمك
ويبعت ورده ع العنوان
بلون همسك
*********
سرب البنات سكر نبات متوجهين للمدرسه
نبتة قلوب ناسيه الغروب بالجمال متونسه
لقمه هنيه رايحه وجيه بالخيال متغمسه
ييجي عريس يارب  قبل ما ييجي المسا
*********

حبيبي جميل وصغير
في ايده الورده بتنور
ورغم انه بعيد عني
يكلمني الكلام سكر
*********
شفايفه مصنع السكر
احب ف عينه اتصور
عيونه تقول كلام يسكر
وأكتب منها وأشير
*********
ومهما البعد يتجبر
عمر القلب ما تغير
تمر ايام وتتعبنا
لكن الحب كان اكبر
*********
صباح الور والياسمين
على ام العيون حلوين
ومهما تكونوا مش فاكرين
احنا في حبكم هايمين
*********
نادي صباحك وجميل
 حنانك بكر ما له مثبل
عيونك عشقت المواويل
وروحك  شهد زي النيل
*********
صباحنا نادي
ومش عادي
طلة عيونك نورت
الدلتا والوادي
*********
صباح المحبه
اللي ما تستخبى
وتدخل على القلب
حبه ب حبه
*********
ياحبيبة قلب روحي
فيك داب النيل  بنظره
لمسه وتداوي جروحي
وكل صحرا تبقى خضره
*********
مليان قليبك جمال
بحرك محبه ودلال
وتقول عيونك كلام 
يهز عرش الخيال
*********
حبيبي
كيف حاله
وايه شاغل باله
يمكن يكون حبي
يارب
يحلى له
*********
صباح نادي
بيزرع ورد
مليان ود
بكل الحب
يروح للقلب
ويهادي
ويركب مهره
وينادي
ويملا الدلتا
والوادي
بعطر
 و سحر
مش عادي
*********
صوتك دافي
وقلبك صافي
وحبك جوه
القلب موافي
*********
انا من حقي
أحب واغني
ياللي عيونك
شغلت فني
حتي ف نومي
تيجي تزورني
دايما ساكنه
ف روحي وحضني
*********
دفيني بصوتك واحميني
دا عيونك رقصت ف عيوني
دقات القلب أما يشوفك
تتمني تكوني ف احضاني
#قصائدقصيره  24
#السيدابوطاحون
#الأخنوم