(فمرمة زمان)" ادريس جبيلو"

فمرمة زمان

يلا السحابة حاملة
توجعت برگت ورعدت
وركبت جناح الريح راحلة
الرحمة فكرشها جمدت
عطات بالصدة هابلة
مابكات ماولدت غ تنهدت
على التربة القاحلة
اللي ماروات ماهمدت

العجب اللي مايعجب
عمر الارض وشطاينها
شي يزغرت وشي يجدب
وشي منتوفة صوف بطاينها
مااتغزل مااتسدى ماتتجرب
فمرمة زمان وطاينها
شي اتنفى وشي تغرب
وشي تمكن من دفاينها

الجفاف والغلا(ء) عرسوا
وساروا فالدنيا يفرخوا
الفحش والمنكرتوانسوا
والعقول بهم تفرشخوا
الصالح الطالح يهرسه
والوتاق والعاهد تفسخوا
الفقيه والمحضار تفلسوا
واللوح والكراك مسخوا

ياخزيت من هاد الادمان
الناس قساوا وهاسوا
نساوا الهمة والشان
كلها ويجر وساد راسه
فالقلوب مابقى ايمان
ؤكلها وتحرف بفاسه
الشبعان مايفكر فالجيعان
والدم حقد على ناسه

شحال من عاقل جاهل
يغصب فالناس بلا قياس
جابد سناحه يتقاتل
خايف يطيح عليه سلاس
والمراة لاحت القراشل
بدلت المشية واللباس
تشهرت بالصبايغ والمكاحل
وتزينت بمحراب النعاس

الايجارة تجارة بالاثارة
يلا عندك الزين توضفه
بهمسة ولا غمزة بإشارة
العين كلامها تعرفه
تهمز وتلمز ليمارة
بميزانها وصروفها تصرفه
العزبة ماتحضي بكارة
واللي طلبها تضايفه

بقلم ادريس جبيلو
المغرب