مجموعة قصائد قصيرة بقلم الشاعر السيد أبو طاحون

قصائد قصيره 50   *** بقلم السيدابوطاحون
*********
بيني وبين قلبك خطاوي قليله
وساعات تباني بتسبحي فوق النجوم
تحت رموشك حيره تولد اسئله
مين السبب في الخيبه وغياب الغيوم ؟!
*********
على باب حبيبي بيبتسم طيفي
وتحاصر البساتين جدور خوفي
هلت نجوم السما بالعطر بتغني
طوفي يا شمس وعطري حروفي

*********
طب اعمل ايه
 في قلبي اللي
 بحبك موت
وليه الحب
يبقي عذاب
 وخوف و سكوت
وليه أوصل
 حدود قلبك
وما اعرف افوت
*********
من غير حبيبي الدنيا ما تساوي
الحزن يسكن دموع العين ويخاوي
انت الحبيب وانت الدوا والطبيب
قولي يا روحي ناوي ولا مش ناوي ؟
*********
وقف الغراب على الخراب
وقال يا ناس عادي !
يا فقر يا ابن الفساد
نادي على القاضي !
*********
ياللي زرعت الخوف  مكان الورد
وبدرت كيس الزيف  وعدى الحد
سرح العمى في السيف وتاه الرد
هرب الحبيب والضيف وهان الود
*********
كل اللي فكر  زمان
 الثوره مش هتطوله
لما اتزنق في الميدان
تاه منه عرضه وطوله
*********
مال الخيانه كانت سوده
وبقت بيضه؟
قرف الشرف
ومش لاقي ولا اوضه
*********
شجر الخريف مش ضيف
مالك وصاحب ارض
كامن لحد الربيع
يقوم و يعمل عرض
*********
ومهما تطاطي يا واطي
وتركب ف قطر الخيانه
هتفضل حمار
وبكره هتعرف
 ان خط المهانة
عمره ما يوصل محطة نهار
*********
(شاطره) ياااه ع الأدب والذوق
وناس في الضيقه بصه لفوق
وقلب يعاني شمسه شروق
ورغم الازمه بيعافر ومش مخنوق
*********
#قصائدقصيره50
#السيدابوطاحون
#الأخنوم