شخطة قلم....بقلم الشاعر " خضر خليفه "

شخطة قلم
يا شخطة القلم قديشك جريئه
تحت رحمتك  بتعيش  الخليقه
حامل القلم بيحسبلك حساب
ما بتغفي عن عينه ولا دقيقه
شاعر لو حب يكتب كتاب
مسك قلم ت يحاكي العشيقه
بيبقى  مردد خايف ومرتاب
بيختارالحرف والكلمه الدقيقه
عريس وعروس بيكتبوا كتاب
بدلال وغنج  بافراح وموسيقه
وحده توقيع قلم بيرفع حجاب
بيوثق علاقه بحق و حقيقه
وذات القلم  بيفرق احباب
بتصير المطلق وهي الطليقه
شخطة حكم بترفع عذاب
بتفك اسر مظلوم بتحل ضيقه
يمكن ع بيوت تحكم  بخراب
شخطه ظلمت النفس البريئه
امضاء من رئيس النائب  ناب
وبقلم مأمور عطيت وثيقه
قديشك يا قلم عامل اصحاب
بتكم افواه بتفتح  بواب
بتنبش  دفاترنا  العتيقة
خضر خليفه