عم شمسن بقلم الشاعر زياد عقيقي

عم شمّسُن: قصيدة من سنة ال1995
شو خايفِه
إدبل أنا بعينيك
وأوعى وما لاقي قصتي عندَك
ويعطش خيالي
بمسكَبِة إيديك
وشي حلم تاني ينام
عا زندك !!!
*     *     *     *
خايفي من النوم يسرقني
وأوعا بوهم موعود
والموعد اللي كان يحرقني
بتشّات جمر
... برود
خايفِه ... ما يعود
وخايفِه
شي إيد تسبقني
عا كَرْمك...
 وما ترحم العنقود
*     *     *     *
وحدك حبيبي وعلّة وجودي
والسكرة الما بعدها سكرَه
الغفيت ... بعنقودي
وشو بخاف يا بكرا
شو بخاف من تشرين ع ورودي
اللي تفتّحِت عا غنجة النطرا
*    *    *    *
قِللي دخيلَك قول
طمّنّي
طفّي جنوني بنارَك الأشعار
وما زالك المشوار
الما بيوصل ولا نهار
حرقني بنار الشعر
... وحضنّي
شو بحبّ رقص النار !!!