وينو بقلم الشاعر خالد الأعور

..... وينو.....

شفتك يا بيي بس بالصورة
بعدو ما عندي دمع ت ابكيك
شوقي الك دمعات معصورة
صغير وما وبحكي القلب عم يحكيك
............     ..........    ..........
واوقف على الشباك انطر رجوعك
وكل ما يمرق عسكري أسألو عنّك
معلِّم ع كتفو حرقة دموعك
حامل وديعة حكي الي مِنَّك
............     .........    ...........
بيّك بطل ع العلم ارزة
بيبقى الوطن لو ناس غشّاشة
اسمو انغرز بالمجد غرزة
بيفنى الجسد والروح عيّاشة
..........    ...........     ...........
وعِدني ما تبكي اذا بتُكبر
حمول اسمي وكللو بالغار
ورفاع راسك بِ زمن اغبر
وكمّل مع رفاقي بقوة المشوار
.........    ...........    .............