(نجوم فالعلالي)بقلم الشاعر " ادريس جبيلو "

نجوم فالعلالي

جات على بالي... صورة ليا تتقدم
          باغية عليا تهجم
      عانقتني وبدات تتكلم
   شفتها فخيالي... كلام منضم
        لحنه يطرب وينغم
      يسكن القلب ويترسم
اتغصب ياخليلي... بالعشق محزم
        للهيام استاذ ومعلم
        عطره ريحان ؤبلسم
   ريحه هلالي... بالزهر منسم
       بحره غاوي مايتهزم
    والمركب سماوي مايتورم
 حروفه تشالي... بالدواية والقلم
        حكمة وقدوة فالعلم
        قصيدة وغنوة فالدم
 فمحراب الوالي... تمجد وتعظم
       اللي جاد وخلق وانعم
        ابدع فالكون وارسم
   نجوم فالعلالي... وقمر يحلم
        بنور الشمس يرشم
       قوافيه فالليل المظلم
 والمعنى ياغالي... تزوق وتوالم
      عشق القلوب بالموسم
     وهمس الوساد فالمرسم
فسطور الوصالي... بالقفلة والرسم
        وعيون فايقة تحلم
      بعرسان للقاها ماتعلم
  ياعاشق الليالي... نطق وتكلم
     واحكي على داك السقم
     لاتنافق لاتراري لاتحشم
   شوف حالي... وافضح لاتكتم
           مادار فيا الهوام
      حين غزالي للتطبيع تقدم
  وكيف موالي... العاشق وشم
      زهره اللي فاح واتعدم
       مشنوق فداك المعصم

بقلم ادريس جبيلو
المغرب