وصية شهيد بقلم ضمير الوطن زياد عقيقي

وصيّة شهيد:قصيدة نلت عليا جايزة كبيرة بإيام المدرسة وكان عمري 15...واليوم .عمري 50 ...وبعدا القصيدة عم تبكي

بخاطرك يَميّ
رايح أنا عالحرب
لا تحملي همّي
ولا تبلّي الدرب...بدموعك
ليش البكي
تبقي إذا ما رجعت لا تبكي
وأوعك عليي تلبسي الأسود
أوعى يا إمّي بعدها تشكي
رح موت كرمال الوطن يسعد
رايح لحتى خلّصو لشعبي
رايح ت إخلص من شقا هالناس
زيحي بقا..لا تسكّري دربي
مين قبلي بيشربو هالكاس؟!

وشو صار يا أختي
ت بدمعتك لحتِ
تشجّعي شويّي
وتبقي إذا لمحتِ
شباح الموت فيي
رتبي الإكليل عا تختي
وتبقي اصرخيلي بصوت حنّيّة
حدّ القبر
ون رحت يا خيي
بهزّ القبر وبقول بصرخة عذاب
من بعد ما يحطّوا ع قبري تراب
وبقول :من هالموت لو فيي
إرجع لحتّى موت يوميّه
كرمال إنّي خلّصك لبنان
***
وإنت يا خيي
تبقى وقت ما بموت
تشجّعلك شويّه
وعالمعارك فوت
روح واسقي الأرض بيدمّك
لا تعود
حتى ان صرّخت إمك
روح دافع عن أرض خضرا
ما طاقت العدوان بيعمرا
حطّم قيود الذلّ
تبقى محلّي حلّ
وزورني بالقبر شي مرّه
وازرع ع قبري الأرزة الخضرا
تا كلّ ما يمرق بقبري خيال
يقرا ع قبري قصّة الأبطال
بنظره
بخاطرك رح فل
وهونيك بدي ضلّ
مطرح ما أرضي ذلّها محتل
أرضي الما خلقت يوم
تا تنذلّ
أرضي يا إمّي ...بتشبهك: إمّي
وان متّ بدّا تضمّني ضمّة
ويبقى الأرز عالي ...وعالي يضلّ
بخاطرك...بخاطرك يا امي...